Հայաստանի երիտասարդ նյարդաբանների լիգա

Մեր ժողովրդի համար խորհրդանշական ամսթվերից մեկը` սեպտեմբերի 21-ը, Հայկական բժշկական ասոցիացիայի (ՀԲԱ) համար դարձավ կրկնակի տոնական, քանզի 2006 թ. հենց սեպտեմբերի 21-ին հրավիրված և հայկական նյարդաբանության ներկայիս խնդիրներին և ապագա ծրագրերին նվիրված "կլոր սեղան"  քննարկման ընթացքում  որոշվեց ստեղծել կառույց, որը նպատակ կունենա աջակցել երիտասարդ նյարդաբաններին, պաշտպանել նրանց շահերը, օգնել վերապատրաստվել միջազգային ճանաչում ունեցող արտասահմանյան կլինիկաներում, համագործակցել բժշկական այլ կազմակերպությունների հետ, խթանել նյարդաբանների ներգրավումը գիտական աշխատանքներին, կազմակերպել ուսումնական սեմինարներ և գիտաժողովներ։

Այս ինքնատիպ կառույցը, որի կորիզը կազմում են ՀԲԱ անդամները, կոչվեց Հայաստանի երիտասարդ նյարդաբանների լիգա (ՀԵՆԼ)։ Այսպիսով ՀԲԱ համալրվեց ևս մեկ հեռանկարային ստորաբաժանումով։ Լիգայի նախագահ ընտրվեց ԵՊԲՀ նյարդաբանության ամբիոնի ասպիրանտ Սամսոն Խաչատրյանը։ Լիգայի անդամները իսկույն ձեռնամուխ եղան կառույցի 2006-2007 թ.թ. ուսումնական ծրագրերի մշակմանը։

Արդեն 2006 թ. հոկտեմբերին կազմակերպվեց ինսուլտների կանխարգելմանն ու բուժմանը նվիրված առաջին սեմինարը, որն անցկացվեց ԵՊԲՀ Դիլիջանի ուսումնաարտադրական բազայում։ Սեմինարին մասնակցեցին 23 նյարդաբաններ և նյարդաբանության հետ առնչվող այլ մասնագետներ։ Սեմինարի ընթացքում մանրամասն ներկայացվեցին ինսուլտների կանխարգելմանն ու բուժմանը վերաբերող նորագույն տեղեկություններ, ընթերցվեցին արդի համաշխարհային բժշկության ձեռքբերումներին նվիրված ինքնատիպ զեկուցումներ։

Չդավաճանելով ՀԲԱ սկզբունքներին` այս ամենին նախորդեց ապացուցողական բժշկությանը նվիրված դասախոսությունը, որի շնորհիվ մասնակիցները ավելի հեշտությամբ ըմբռնեցին սեմինարի ընթացքում ներկայացվող նյութերը։

Ամանորյա տոներից հետո ՀԵՆԼ անցավ 2007 թ. ծրագրերի նախապատրաստմանը։ Հունվարի 25-26-ին ՀՀ ԱՆ Առողջապահության ազգային ինստիտուտում անցկացվեց ''Գլխացավ. ժամանակակից մոտեցումները'' թեմայով սեմինարը, որին մասնակցեցին դարձյալ մեծ թվով նյարդաբաններ, թերապևտներ և ընտանեկան բժիշկներ։ Սեմինարի առաջին օրը ամբողջությամբ նվիրված էր միգրենին։ Կազմակերպվեց հատուկ դասախոսություն` ''Նեյրոիմիջինգի անհրաժեշտությունը և ցուցումները գլխացավերի ժամանակ'' թեմայով։ Մասնակիցներին ինչպես միշտ վկայագրերի հետ մեկտեղ տրվեցին նաև սկավառակներ՝ համապատասխան դասախոսություններով և այլ նյութերով։

ՀԵՆԼ բոլոր անդամները պարբերաբար տեղեկացվում են արտերկրում վերապատրաստման հնարավորությունների մասին, հայտեր են ներկայացնում՝ մասնակցելու զանազան մասնագիտական միջազգային գիտաժողովներին և սեմինարներին։

 ՀԵՆԼ նաև համագործակցում է Հայաստանի նյարդաբանների ասոցիացիայի հետ` համապատասխան թեմաներով գործնական ցուցումներ պատրաստելու և նյարդաբանների շրջանում տարածելու նպատակով։

Իրականացնելով իր ծրագրերը` ՀԵՆԼ միշտ ձգտում է առավելագույնս ժամանակակից և ապացուցողական բժշկության սկզբունքների վրա հիմնված ինֆորմացիա տրամադրել մասնակիցներին և անցկացվող սեմինարների շնորհիվ հասնել նյարդաբանների շրջանում բուժման մոտեցումների ինտեգրացմանը միջազգային չափանիշներին։

Կազմակերպության դռները բաց են բոլոր երիտասարդ նյարդաբանների համար, որոնք ցանկություն ունեն անդամակցելու և իրենց լուման ներդնելու հայրենական նյարդաբանության զարգացման գործում։

Հարցեր, պատասխաններ, մեկնաբանություններ